AGADIC

Centro Coreográfico Galego

Castelán | Inglés

Contacto | Mapa web | Subscrición



Noticias



A UNIDADE DE DANZA DA XUNTA OFRECEU UN TOTAL DE 12 FUNCIÓNS EN SETE ESCENARIOS GALEGOS NUNHA PRIMEIRA QUENDA DE REPRESENTACIÓNS DA SÚA VERSIÓN DO CLÁSICO DE TCHAIKOVSKI E PETIPA

A xira do "Quebranoces" do Centro Coreográfico Galego congregou xa máis de 13.400 espectadores

[25/02/2013] A Consellería de Cultura, Educación e Ordenación Universitaria reuniu máis de 13.400 espectadores durante a xira que o Centro Coreográfico Galego (CCG) desenvolveu entre os meses de decembro e febreiro coa súa versión do ballet clásico Quebranoces, da que ofreceu un total de 12 funcións en sete escenarios de toda Galicia.

Nesta primeira quenda de representacións da célebre obra Tchaikovski e Petipa, a unidade de danza da Xunta de Galicia colaborou cun total de 13 conservatorios e escolas de danza, de xeito que os seus alumnos -máis de 360 rapaces e rapazas con idades comprendidas entres os 6 e os 17 anos- tiveron a oportunidade de participar no espectáculo como integrantes do corpo de baile que encabezan os bailaríns do Centro Coreográfico Galego Ástrid Molinero, Ariel A. Caramés, Miguel A. Ponte, Ailen Ramos e María Amparo Alemany.

Cheos absolutos
O Quebranoces contou, ademais, coa música en directo da Orquestra Sinfónica de Galicia e da Filharmónica Cidade de Pontevedra e o Coro Infantil do Conservatorio Profesional de Música Manuel Quiroga nas súa respectivas presentacións na Coruña e Pontevedra, en ambos casos co aforo completo en todos os pases do espectáculo.

Especialmente significativo foi o caso do Pazo da Ópera coruñés, onde o CCG maila Sinfónica ofreceron unha versión especial en formato didáctico, coa que conseguiron cheos absolutos nas seis funcións ofrecidas -cinco delas concertadas con centros escolares e unha para público familiar- e sumaron máis de 10.000 espectadores.

Proceso aberto
Estreado o pasado 22 de decembro en Vilagarcía, o Quebranoces chegou aos escenarios galegos como culminación dun longo proceso aberto e participativo que dera comezo un ano antes coas audicións aos alumnos dos conservatorios e os centros de danza colaboradores. De feito e máis alá da súa exhibición pública, esta proposta ten como prioridade impulsar unha liña de traballo común entre o Centro Coreográfico e as escolas galegas de danza co obxectivo de captar novos espectadores para esta disciplina artística, así como de incentivar a motivación de estudantes e profesores mediante a súa implicación directa no desenvolvemento dunha produción coreográfica a nivel profesional.

O Quebranoces, que ten previsto continuar o seu percorrido polos escenarios galegos durante este ano 2013, é ademais a primeira produción de danza clásica acometida pola compañía pública desde a súa creación hai seis anos. Nela, o CCG ofrece unha versión que respecta rigorosamente os canons interpretativos da composición e coreografía orixinais, ao tempo que introduce símbolos e trazos do imaxinario popular galego tanto na escenografía, que recrea as galerías brancas da Mariña coruñesa, como no vestiario, inspirado nas míticas figuras de Sargadelos e nalgúns dos máis famosos personaxes do Entroido ourensán.

Ligazóns


< Volver


Accesibilidade | Aviso legal
Facebook

Marca gráfica da Xunta de GaliciaAGADIC. Instituto galego das artes escénicas e musicais