AGADIC

Centro Coreográfico Galego

Castelán | Inglés

Contacto | Mapa web | Subscrición



Noticias



UN TOTAL DE 13 ALUMNOS SEGUIRÁN AS CLASES DO COREÓGRAFO MADRILEÑO

O CCG imparte na Escola Superior de Arte Dramática de Vigo un obradoiro de composición coreográfica a cargo do mestre Ángel Rodríguez

[21/07/2014] A Consellería de Cultura, Educación e Ordenación Universitaria ofrece desde hoxe e ata o próximo venres 25 en Vigo un obradoiro de composición coreográfica impartido polo coreógrafo madrileño Ángel Rodríguez. O taller, que se desenvolve nas instalacións da ESAD de Galicia (Escola Superior de Arte Dramática), está organizado polo Centro Coreográfico Galego (CCG) como parte do seu plan formativo para 2014.

Dirixido a profesionais da danza e a estudantes de nivel alto-medio, o obradoiro insírese na liña de traballo que Cultura e Educación leva a cabo a través do CCG no ámbito da formación continua e da creación de públicos.

Para a proposta de Ángel Rodríguez son 13 os inscritos: seis estudantes, tres bailarinas e catro profesoras de danza, todos eles galegos. O seu traballo comezará cunha primeira sesión dedicada a desenvolver unha clase de danza clásica e centrarase a continuación na creación coreográfica partindo da investigación e da experimentación.

Este é o terceiro obradoiro que desenvolve este ano o CCG dentro do seu plan formativo, despois dos que xa impartiron na Coruña Eva Pérez Atienza, sobre gyrokinesis e danza clásica; e Virginia Valero, tamén sobre danza clásica. Para o mes de decembro está previsto o último curso desta serie, que correrá a cargo do bailarín cubano Lázaro Carreño e versará especificamente sobre a técnica de puntas.

Mestre ecléctico
Ángel Rodríguez é coreógrafo e mestre de formación e traxectoria ecléctica. Foi adxunto á dirección do Ballet Carmen Roche, ademais de ter creado pezas para destacadas compañías dentro e fóra de España, como a Nacional de Danza, a de Rafael Amargo, o Ballet do Teatro Mijáilovski de San Petersburgo ou o propio Centro Coreográfico Galego, para o que en 2011 asinou ‘Dulce memoria’ como parte do espectáculo ‘3DTres’.

Tamén ten realizado traballos coreográficos para películas e para os musicais ‘On Bradway’ e ‘Jesucristo Superstar’. Na actualidade é profesor no Instituto Superior de Danza Alicia Alonso.

< Volver


Accesibilidade | Aviso legal
Facebook

Marca gráfica da Xunta de GaliciaAGADIC. Instituto galego das artes escénicas e musicais