AGADIC

Centro Coreográfico Galego

Castelán | Inglés

Contacto | Mapa web | Subscrición



Noticias



COINCIDINDO COA ACTUACIÓN DA SÚA COMPAÑÍA NO TEATRO COLÓN

Carmen Roche imparte unha 'master class' especial mañá sábado no Centro Coreográfico

[07/11/2014] A Consellería de Cultura, Educación e Ordenación Universitaria incorpora unha ‘master class’ da recoñecida mestra Carmen Roche á oferta formativa que está a desenvolver este outono a través do Centro Coreográfico Galego (CCG). Esta sesión especial terá lugar na sede da compañía pública mañá sábado 8, de 10.00 a 12.00 horas, coincidindo coa estadía na Coruña do Ballet Carmen Roche para representar o seu espectáculo ‘Timeless. De Petipa a Nacho Duato’ ás 20.30 horas no Teatro Colón.

Dirixida a estudantes e profesionais da danza, esta ‘master class’ completarase cunha charla e un coloquio cos asistentes. O Centro Coreográfico Galego estableceu un límite máximo de 10 prazas.

Esta acción formativa, así como a sesión ‘Abrir unha práctica física con Jean Philippe Dury’ que terá lugar o día 14 no marco do programa TRCDanza do Teatro Rosalía, súmase ao programa de obradoiros que a unidade de produción de danza da Consellería de Cultura e Educación está a organizar durante este outono. Así, o CCG acolle desde o pasado día 3 e ata o 14 de novembro un taller de danza e creación contemporánea que, baixo o título ‘Encontros para a investigación. O corpo como proxección do diálogo interior’, imparten os integrantes da compañía Entremáns Kirenia Martínez e Armando Martén. Ademais e ata o 20 de decembro, Juan Miguel Hernández está a conducir as clases de danza clásica dos sábados e o vindeiro día 15 dará comezo un novo taller de repertorio clásico e neoclásico a cargo de Christelle Horna.

Dentro deste mesmo programa, durante a primeira semana de decembro levarase a cabo o taller ‘Danza clásica e técnica de puntas’ da man de Lázaro Carreño, quen durante tres décadas percorreu todo o mundo como primeiro bailarín do Ballet Nacional de Cuba.

Traxectoria internacional
Fundadora e directora do ballet que leva o seu nome, así como do Conservatorio de Danza Scaena de Madrid, Carmen Roche conta cunha das máis destacadas traxectorias no ámbito da danza a nivel estatal e mesmo internacional.

Tras estudar coa mestra de María de Ávila na súa Zaragoza natal, comeza a súa carreira profesional con tan só 13 anos como solista do Ballet de Antonio. En 1966 incorpórase ao Ballet Gulbenkian de Lisboa, onde interpreta primeiros roles do repertorio clásico, e dous anos máis tarde pasa a formar parte do Ballet du XXe Siècle de Maurice Béjart, no que desenvolveu un destacado labor artístico ata que en 1974 foi nomeada profesora da compañía e directora do seu centro Mudra en Bruxelas.

De volta en España, en 1979 inicia una nova etapa como subdirectora do Ballet Clásico Nacional e directora da Escola Nacional de Danza Clásica. En 1984 crea o Centro Internacional de Danza de Madrid e en 1998, a Fundación mailo Ballet Carmen Roche, que continúa a dirixir na actualidade.

Así mesmo, imparte cursos avanzados, 'master class' e conferencias en institucións de todo o mundo, ademais de ser xurado en concursos internacionais como os de Beijing, Roma ou Berlín, entre outros.

A súa gran traxectoria valeulle numerosos premios e recoñecementos, como a Medalla ao Mérito das Belas Artes do Ministerio de Cultura (1995) a Medalla de Ouro das Belas Artes (2012), así como e a Medalla á Excelencia Artística outorgada polo Goberno de Nicaragua (2009).

< Volver


Accesibilidade | Aviso legal
Facebook

Marca gráfica da Xunta de GaliciaAGADIC. Instituto galego das artes escénicas e musicais