AGADIC

Centro Coreográfico Galego

Castelán | Inglés

Contacto | Mapa web | Subscrición



Noticias



ESTRÉASE O 9 DE SETEMBRO NO TEATRO COLÓN DA CORUÑA

Trinta bailaríns e bailarinas participan mañá nas audicións para 'As catro estacións'

[09/06/2016] Un total de 30 bailaríns e bailarinas participarán mañá na Coruña nas audicións convocadas pola Axencia Galega das Industrias culturais (Agadic) para seleccionar o corpo de baile de oito intérpretes que porá en escena ĎAs catro estaciónsí, a nova produción que o Centro Coreográfico Galego (CCG) estreará o 9 de setembro na Coruña.

Os aspirantes que superaron a primeira fase de valoración do currículo formativo e profesional deberán agora demostrar a súa calidade artística e técnica diante do tribunal. Del forman parte os dous coreógrafos convidados para este nova proposta da unidade de danza da Agadic: o creador vasco afincado en Madrid Iker Gómez e o británico Kenneth Tindall.

Probas eliminatorias
Esta fase de audicións, que terá lugar na sede do Centro Coreográfico Galego no Complexo Deportivo de Elviña a partir das 9.30 horas, constará de dúas probas eliminatorias. En primeiro lugar, os candidatos deberán participar nunha clase de danza clásica durante a que os membros do tribunal analizarán a súa calidade artística, técnica de puntas e de paso a dous. A continuación, os que superen esta proba deberán executar un fragmento de diverso material coreográfico de Iker Gómez e Kenneth Tindall que lles será amosado nese momento. O xurado poderá pedirlles, así mesmo, que exhiban a súa competencia en dúos.

O obxectivo é seleccionar as catro bailarinas e os catro bailaríns que interpretarán o próximo espectáculo do CCG, a partir da famosa obra de Vivaldi que é, ademais, un dos grandes referentes da música barroca. Trátase dunha composición moi descritiva que evoca distintos aspectos das catro estacións do ano e que, neste caso, apoiarase na danza para transportar o público a cada unha delas.

A estrea de ĎAs catro estaciónsí terá lugar o venres 9 de setembro no Teatro Colón da Coruña para iniciar despois unha xira dentro da que poderá verse tamén no Salón Teatro de Santiago do 1 ao 3 de decembro.

Ligazóns


< Volver


Accesibilidade | Aviso legal
Facebook

Marca gráfica da Xunta de GaliciaAGADIC. Instituto galego das artes escénicas e musicais