LEVARÁ POR TÍTULO "ETHERIA. A VIAXE SOÑADA" E EVOCARÁ O PERIPLO DA PROTAGONISTA DESDE XERUSALÉN ATÉ COMPOSTELA A TRAVÉS DE DANZA, IMAXE E MÚSICA
Mercedes Suárez dirixirá o próximo espectáculo do Centro Coreográfico Galego
[19/02/2010] A coreógrafa coruñesa Mercedes Suárez Rodríguez, fundadora da compañía Druída Danza, dirixirá o próximo espectáculo do Centro Coreográfico Galego (CCG) a petición da dirección da AGADIC (Axencia Galega das Industrias Culturais). A nova produción, que levará por título Etheria. A viaxe soñada, evocará por medio da danza, a música e a imaxe o periplo da protagonista, unha relixiosa galega no século IV, na súa peregrinación de retorno desde Xerusalén até Compostela.
O proxecto presentado por Mercedes Suárez foi elixido entre varias propostas presentadas para o mesmo fin, que foran solicitadas pola AGADIC a distintos creadores galegos para a levar a cabo a dirección artística da que será a cuarta produción do CCG, despois de
Vacuo, de Maruxa Salas;
Kiosco das almas perdidas, de Roberto Oliván; e
Giseliña, de Cisco Aznar.
Suárez participará ademais activamente na selección de bailaríns e bailarinas que interpretarán esta produción, para o que se abrirá un procedemento de dúas fases: unha primeira de achega de historiais e méritos dos aspirantes; e unha segunda de audición pública unicamente aos preseleccionados da fase anterior. Está previsto que os ensaios con todo o elenco comecen unha vez formalizados os contratos e se desenvolvan durante un mínimo de dous meses, de modo que o espectáculo poida estrearse diante do público a finais de primavera.
Mercedes Suárez Rodríguez (Agualada, Coristanco-A Coruña) é titulada en danza clásica polo Real Conservatorio de Danza de Madrid. Realizou estudos de danza clásica en Madrid, París e Bruxelas con profesores como Víctor Ullate, Carmen Roche, Emilio Altés, Irina Gryvina e Eva Borg. En 1982 funda na Coruña a escola de danza Druída, e máis tarde, a compañía Druída Danza, na que veu desenvolvendo coreografías de achegamento ao sentir popular, afastadas da danza puramente folclórica, coa literatura universal como fonte frecuente de inspiración e coa aposta pola interdisciplinariedade artística como forma de expresión.
Na actualidade segue a compaxinar o traballo de mestra co de coreógrafa. Así, para Druída Danza creou e dirixiu nos últimos anos os espectáculos coreográficos
Abcdanza,
Opus 80,
O almorzo da nécora (2008),
Verde transparente (2006),
20 anos non é nada (2005),
A redeira (2004),
O calar do tempo (2003),
Lúa amarga (2002),
En espera (2001) e
Metamorfosis (2000).
Tamén imparte asiduamente clases de danza como mestra convidada en distintas entidades e deseña coreografías para distintos espectáculos teatrais, óperas, concertos, programas de televisión e eventos.
Documentos
< Volver
Facebook
